Универзитетот „Св.Климент Охридски“ денеска во Битола ја одржа манифестацијата „Отворен ден“ на која својата академска понуда ја претставија сите високообразовни институции од овој Универзитет.
Манифестацијата, нагласи ректорот Златко Жоглев, ќе биде традиционална бидејќи се потврдува дека тоа е начинот како Универзитетот може да биде поблизок до идните студенти.
– Годинава имаме и нови студиски програми, адаптирани според барањата на пазарот и барањата на нашите клиенти. Тое е резултат на истражувањата што ги правиме во соработка со ресорното министерство за да може новите студиски програми да бидат реални, посочи ректорот Жоглев.
Манифестацијата „Отворен ден“ што ја организираше Универзитетот „Св.Климент Охридски“-Битола ја поддржа градоначалникот Владимир Талески кој најави директна соработка со високообразовнитеинстируции.
– Ова е добар начин да се создаваат општествени вредности. Младите треба да ги насочуваме, затоа што влогот во едукација, образование, и специјализирање е начин младите да се задржат во градот, а ние ќе продолжиме со создавање услови за нови работни места и нивно вработување, истакна Талески.
Универзитетот „Св.Климент Охридски“-Битола годинава ќе овозможи да се запишат 4.160 студенти, од нив 2.520 редовни студенти во државна квота, 1.110 редовни студенти со кофинансирање во студиите и 530 вонредни студенти.