На плоштадите во Берово и Делчево, како и пред изборните штабови на ВМРО-ДПМНЕ и коалицијата „За подобра Македонија“ се слави победата во вториот круг на кандидатите за градоначалници Драги Наџински и Дарко Шехтански.
Според податоците од партиските штабови и неофицијалните податоци од општинските изборни комисии Драги Наџински од ВМРО-ДПМНЕ го победи противкандидатот од СДСМ Звонко Пекевски и останува на чело на општина Берово и во наредните четири години, а нов градоначалник на Делчево е Дарко Шехтански, кој доби над 2.000 гласа повеќе од кандидатот на СДСМ, Голубчо Ангелов.
На своите членови и симпатизери им се обратија новоизбраните градоначалници изразувајќи благодарност за довербата и ветија дека уште од утре ќе започнат со работа и реализација на проектите ветени во изборните програми.