Портпаролот на опозициската СДСМ Петре Шилегов, наместо да се занимава со договори за закупнина на други лица кои законски и уредно го пријавиле својот имот и приходите кои ги остваруваат од него, да објасни зошто информациите кои ги поднел во неговиот анкетен лист не соодветствуваат со пријавените податоци во Агенцијата за катастар на недвижности, побара ВМРО-ДПМНЕ.
Како што истакна на денешната прес-конференција пратеникот на ВМРО-ДПМНЕ во Парламентот Александар Стојкоски, Шилегов во својот анкетен лист покрај другите луксузи, имоти и приходи, навел дека под ставката други приходи добива месечна закупнина од имот на брачен другар во висина од 43.000 денари, односно околу 700 евра.
Во анкетниот лист на Шилегов, додада тој, пак, воопшто не е наведено дека неговата сопруга поседува каков било недвижен имот и прашува како е возможно да добива приходи од имот на брачен другар на име закупнина, кога неговата сопруга не поседува никаков недвижен имот.
– Ова е пример како работи господинот Шилегов. Тој добива месечно 700 евра од извор кој не е пријавен и не постои во двете надлежни државни институции, во Државната комисија за спречување на корупцијата и во Агенцијата за катастар на недвижности. Го повикуваме Петре Шилегов да излезе во јавноста и да каже од кој имот на неговата сопруга добива 700 евра месечна закупнина, вели Стојкоски.
