„Јавноста одамна се умори од постојаните обиди на Славјанка Петровска да се претставува како жртва секогаш кога ќе биде повикана на одговорност. Наместо да даде конкретни аргументи и да се соочи со реалноста, таа секој пат користи истата стара тактика – глуми нападната и го пренасочува фокусот од суштинските прашања“ реагираат од владејачката ВМРО-ДПМНЕ на пишувањата на Венко Филипче, Оливер Спасовски и Форумот на жени на СДСМ кои се во врска со изјавата на министерката Димитриеска-Кочоска до пратеничката од СДСМ, Славјанка Петровска, велејќи и дека нема право да зборува за мајки и семејства, за разлика од неа која е мажена, има семејство, има два сина.
„Последниот случај е уште еден доказ за ова. Министерката за финансии, Гордана Димитриеска-Кочоска, зборуваше за реалните трошоци на едно четиричлено семејство, нешто што сите граѓани го чувствуваат на своја кожа. Но, наместо аргументирана дебата, Петровска повторно избра да игра на картата на жртвата, надевајќи се дека така ќе ги избегне суштинските теми“ велат од ВМРО-ДПМНЕ и дополнуваат:
„Граѓаните заслужуваат одговори, а не лажна емпатија и театралност. Време е Петровска да престане со оваа политичка манипулација и конечно да понуди нешто повеќе од лични повреди и празни фрази“.