Македонија е една од најмалку задолжените земји во Европа. Нејзиниот долг е половина од државниот долг на скоро сите нејзини соседи, а да не ги споменуваме останатите европски земји чиј долг изнесува и над 100 проценти, истакнува ВМРО-ДПМНЕ во писмената реакција на прес-конференцијата на Зоран Јовановски.
„Тоа во своите извештаи го забележаа и кредитните агенции Fitch и Standard and Poors. Нискиот државен долг на Македонија го евидентираа и Светска Банка и Меѓународниот фонд. Сите релевантни финансиски институции ги потврдија стабилните економски политики на оваа Влада во едни исклучително тешки, турбулентни општи економски услови секаде во Европа“, се вели во реакцијата.
ВМРО-ДПМНЕ посочува дека Владата го намалила државниот долг за 25 проценти од задолжувањето што го оставила СДСМ.
„Социјалдемократскиот сојуз прави споредба на сегашната состојба на државен долг, кој изнесува 30,3 проценти од БДП со 2008-ма година, кога државниот долг изнесуваше 20,6 проценти. А зошто во 2008 година имавме државен долг 20,6 проценти? Затоа што Владата на ВМРО-ДПМНЕ предвреме ги исплати задолжувањата на претходната влада на СДСМ“, се наведува во реакцијата од ВМРО-ДПМНЕ.
Оттаму прашуваат дали Јовановски предлага политика на девалвација на денарот, наместо стабилни владини политики на задржување ниски даноци, редовна исплата на пензии и плати и исплата на субвенции.