Никола Тодоров, претседател на Републичкиот изборен штаб на ВМРО-ДПМНЕ и коалицијата „За подобра Македонија“, денеска на прес – конференција ги презентираше програмите на кандидатите за градоначалници од партијата и коалицијата, со кои ќе ја бараат довербата од граѓаните на овие локални избори.
За нас, потенцира Тодоров, ветувањата пред граѓаните се закон по кој работевме до сега, а така и ќе продолжиме да работиме во иднина.
ВМРО-ДПМНЕ и коалицијата „За подобра Македонија“ на претстојните локални избори ќе претстави вкупно 70 програми за 70 општини насекаде низ Македонија.
– Во овие програми на нашите кандидати, се содржат точно 10.112 нови проекти кои се во директен интерес на граѓаните. Овие проекти се внимателно разгледани, селектирани и предложени од нас. ВМРО-ДПМНЕ со целиот свој кредибилитет стои зад овие проекти и програми на нашите кандидати за градоначалници. Поддршката за ВМРО-ДПМНЕ значи поддршка за реализација на овие 10.112 проекти, појасни Тодоров.
Во овие програми, подвлече тој, ќе сретнете прецизни и конкретни проекти за секоја општина, кои се со веќе обезбедена финансиска конструкција.
ВМРО-ДПМНЕ заедно со коалицијата, како што рече, во континуитет на сите избори настапува со свои програми кои содржат издржани проекти кои можат да се исполнат и се исполнуваат, а не нереални ветувања, за што доказ се и отчетите на сработеното што ги изготвуваат сите општини и партијата, со цел да ги запознаат граѓаните за досегашните активности и степенот на реализација на ветеното.
– Се што работиме и се што се обврзуваме дека ќе работиме е ставено на виделина. Ние, ВМРО-ДПМНЕ, бевме први во Република Македонија кои започнавме со изготвување програми и отчети за сработеното што ни дава кредибилитет да продолжиме на патот по кој сме тргнале, за подобар живот на граѓаните на Република Македонија, истакна на прес – конференцијата Никола Тодоров, претседател на Републичкиот изборен штаб на ВМРО-ДПМНЕ и коалицијата „За подобра Македонија“.