На Четвртата седница на Советот на Општина Кратово, советниците од СПМ и ВМРО-ДПМНЕ усвоија одлука за воведување на надоместок за гробарина за кратовчани.
„Иако советниците од редовите на СПМ и ВМРО-ДПМНЕ многу добро ја знаат тешката економска состојба во која се наоѓаат граѓаните на Кратово, и покрај укажувањата на советниците од редовите на СДСМ, кои жестоко се спротивставија на оваа одлука, партиите на власт решија да и од така празниот паричник на своите сограѓани да извадат уште по 300 денари такса за гробарина. Предлогот на Претседателот на Управниот одбор на Јавното претпријатие за комунални дејности и инфраструктура „Кратово“, Зоран Михајлов, истакнат активист на ВМРО-ДПМНЕ, беше експресно усвоен и покрај противењето на советниците од СДСМ“, стои во соопштението на СДСМ.
На прашањето дали оваа такса е неопходна, и зошто баш сега мора да се воведе истата кога граѓаните на Кратово се најсиромашни од било кога, не одговори ниту Градоначалникот Мите Андоновски.
„Постојат ли граници за советниците на СПМ и ВМРО-ДПМНЕ? Ако продолжат со вакво темпо дали набрзо граѓаните на општина Кратово ќе почнат да плаќаат и такса за воздухот кој го дишат“, прашува СДСМ.