Тројца од деветтемина пацинти со коронавирус на Инфективната клиника од утрово имаат лесно влошување на состојбата, извести министерот за здравство Венко Филипче. Тројцата се во повозрасната категорија, над 65 години.
„Имаат тешкотии со дишењето но не се ставени на механичка вентилација. Останатите се со лесна клиничка слика“, рече министерот Филипче.
Утрово уште еден пациент се јавил за тестирање на коронавирус. Се вратил од Германија на седми март, здрав, а утрово се јавил на клиниката со температура.
Филипче информираше и дека вчера била назначена нова директорка на Клиниката за дерматовенерологија, откако претходно беше разрешена Нина Цаца Биљановска, кај која беше детектиран коронавирусот откако таа се врати од Италија, а не се придржуваше до препораките за самоизолација.
Останатите вработени на Клиниката и пациентите кои се во самоизолација се во добра здравствена состојба, информираше министерот за здравство.