Владата донесе измени на законите за државни и за јавни службеници со кои се обезбедуваат правни услови за овозможување поголема мобилност на вработените во администрацијата од една во друга институција и се обезбедува нивна поголема правна заштита.
Како што нагласи на денешната прес – конференција владиниот портпарол Александар Ѓорѓиев, точно се дефинира кои вработени во јавните претпријатија (ЈП) влегуваат во редот на јавните службеници и тоа согласно препораките на Уставниот суд во оваа сфера.
Измените, истакна тој, се во насока на креирање услови за професионален развој на вработените и внесуваат нов квалитет во таа област. Ѓорѓиев подвлече дека се врши точно дефинирање кои вработени во ЈП ќе имаат статус на јавни службеници.
– Јавни службеници ќе станат и вработените во ЈП кои вршат работи од административна природа односно вршат работи од стручно административни, нормативно-правни, извршни, управни, статистички, административно надзорни, плански, кадровски, материјално-финансиски, сметководствени, информатички работи и други работи од административна природа, а во врска во вршењето на работите од јавен интерес согласно закон, појасни Ѓорѓиев.
Втора значајна измена за подобрување на правната заштита на вработените во администрацијата е обврската при евентуална ситуација за прераспределување на вработените односно мобилност, задолжително ќе мора лицето кое е предмет на превземање од една во друга институција, да искаже согласност за таа постапка.
– Досега беше потребна само согласност на раководните органи во институциите односно двопартитно однесување, а сега се воведува трипартитен однос, што значи задолжително во случај на превземање вработен од една државна или јавна институција во друга држававна или јавна институција ќе мора да постои писмена согласност потпишана од вработениот, појасни портпаролот Ѓорѓиев.
На овој начин, истакна, се дава дополнителна правна заштита на интересите на вработените во јавната и државната админситрација, но истовермено се продолжува со процедурите на мобилност за балансирање на суфицитот и дефицитот во некои институции во насока на квалитетно нивелирање на истиот.