Генералниот секретар на Владата на Република Македонија Драги Рашковски, денеска имаше средба со две мрежи на граѓански организации, претставници на ИПА2 механизмот и на неформалната група од 89 организации, кои минатата година јавно реагираа и имаа забелешки на одделни решенија од одлуката за формирање на Совет за соработка на Владата со граѓанскиот сектор, што го формираше претходната влада, соопшти владината прес-служба.
– На овој работен состанок беше потврдена заедничката заложба за функционален Совет за соработка на Владата со граѓанскиот сектор, при што Владата ја презеде обврската сериозно да ги разгледа сите изнесени ставови и забелешки што ги изразија здруженијата на граѓани, се наведува во соопштението.
За таа цел, како што се додава во соопштението, преку инклузивните политики што Владата на Република Македонија ги спроведува, тој функционален Совет за соработка на Владата со граѓанскиот сектор ќе претставува еден од најважните механизми што ќе ги вклучи граѓанските организации како коректив и партнер на Владата во креирањето и спроведувањето на политики во интерес на граѓаните.