Владата со закон ќе ги заштитува меаните. Ќе ја прошири листата на угостителски објекти што традиционално ја отсликуваат македонската народна кујна.
За добивање на ознаката „Национален ресторан-меана“, угостителскиот објект ќе треба во листата за јадења да понуди најмалку 70% домашни традиционални јадења, додека кај вината и пијалоците 80% треба да бидат домашни вина и други пијалоци.
Надворешното и внатрешното уредување на угостителскиот објект треба да содржи мотиви од домашната традиционална култура. Персоналот треба да носи облека на која ќе има апликации и мотиви од традицијата, како везени кошули или соодветна наметка со народни везови, додека музиката која ќе се изведува треба да биде изворна и чалгиска, со акустичен звук.