По сообраќајната несреќа што се случи вчеравечер, а во која директорот на Македонскиот народен театар Драган Спасов Дац управувајќи под дејство на алкохол со своето возило удри 21-годишна девојка , Владата ќе го разреши од раководната функција.
„МВР и сите останати органи ќе го истражат настанот детално и во најкраток можен рок, а сите наоди ќе и бидат презентирани на јавноста. Во секој случај Влада на РМ смета дека секој мора да поднесе одговорност согласно законите. Лице што сторило ваков тежок прекршок и довело во опасност друга личност, за среќа без сериозни последици по нејзиниот живот, не може да раководи со институција и да извршува јавна функција“, соопшти денеска портпаролот на Владата на Република Македонија, Миле Бошњаковски.