По терористичкиот напад на весникот „Шарли Ебдо“, Сара Барниер Лирој од Институтот за човекови права и мир од Каен, регион Долна Нормандија, Франција, кој соработува со Хелсиншкиот комитет за човекови права од Македонија, вели дека Франција научила голема лекција и се соочува со проблемите кои постоеле, но досега не им се обрнувало доволно внимание.
Таа не ги одобрува засилените безбедносни мерки кои владата ги презела по нападот во Париз, но свесна е дека се неопходни. Според Институтот за човекови права од Каен, најодбрите мерки против злосторствата од омраза се долгорочни и најмногу се однесуваат на образованието на младите.
Според Лирој, токму образованието треба да ги научи младите луѓе на разбирање на различностите и дека за идеите не треба да се убива.
– Шарли Ебдо критикуваше се’, не само религиите и затоа слободата на говор е бесценетa работа во едно општество, зашто овозможува да има критика, а без критика, не може да има развој во општеството. Да се каже „Јас сум Шарли“ значи дека си за слобода на изразување.
На прашањето како го коментира фактот што никој од Македонија не учествуваше на големиот марш во Париз, по нападато на весникот „Шарли ебдо“, таа рече дека не е изненадена
– Не сум изненадена дека никој не дојде, познавајќи ја состојбата со слободата на медиумите во Македонија, рече Сара Барниер Лирој од Институтот за човекови права и мир од Каен, Франција.
А.Б.