Синоќа, полициски службеници од Одделот за криминалистичка полиција – Сектор за недозволена трговија со дрога, оружје и опасни материи на улицата „Босна и Херцеговина“ во Скопје го приведоа 37-годишниот А.О. од Гостивар, известува Министерството за внатрешни работи.
Како што информира МВР кај него биле пронајдени околу пет килограми хероин во вредност од околу 200.000 евра, кои ги носел во ранец.
– При преглед на ранецот пронајден е хероинот, кој бил спакуван во девет пакувања. Пронајденото е одземено, А.О. е лишен од слобода и во текот на денот до надлежното ОЈО Скопје ќе биде поднесена соодветна кривична пријава за извршено кривично дело по член 215, соопштува МВР и додава дека ќе продолжи со континуираната борба против недозволената трговија со дрога.