„Со крената глава и чист образ стојам пред вас и се радувам на поддршката што ми ја давате, затоа што работевме заедно и многу во изминатите години за што сведочат делата реализирани во вашето, но и во сите останати села во струмичкиот регион“, рече Зоран Заев градоначалник на општина Струмица и кандидат за трет мандат вечерва на митинг во селото Просениково.
Тој потсети на изградениот водовод, на новото детско игралиште, на асфалтираните улици, на исчистените канали, а најави изградба на систем за фекална канализација, детска градинка, гасификација на полето со што земјоделското производство ќе стасува порано и ќе има поконкурентни цени на европските и светските пазари.
Заев им порача на жителите да не се плашат и да не потклекнуваат на заканите и уцените од власта, ги охрабри понудувајќи им правна помош на сите чии права на социјална помош, додаток за трето дете и детски додаток ќе им бидат загрозени во оваа кампања.