Мирослав Вуиќ, адвокатот на Зоран Заев вели дека не е изненаден од сумата од 500.000 евра, која премиерот Груевски ги бара од лидерот на опозицијата за наводите изнесени во врска со случајот „Македонска банка“.
Вуиќ најави дека сите докази кои ги поседува одбраната ќе бидат откриени на рочиштето закажано за 19 јуни, а според него главен доказ е снимката, која ја слушнала целата македонска јавност.
Тој појаснува дека тужбата, се однесува за изнесување невистинити податоци кои се однесуваат на наводот за продажба на Македонска банка од еден милион и петстотини илјади евра.
– Премерот смета дека половина милион евра се доволни за да му ги стиши душевните болки кои ги имал, ги има или ќе ги има од објавениот текст. За Груевски, тоа е доволен износ, а ние можеме само да го спориме и да побараме да се утврди дали тоа е правичен надомест. Исто така, судот ќе треба да каже какви се тие душевни болки на премиерот и какви послидици ќе остават, зошто сепак се работи за премиер на држава. Јас мислам дека Груевски е сосема добар здравствено и психички – изјави Вуиќ.
Тој очекува успех во овој спор, велејќи дека доказите се непобитни и дека не се работи за никаква клевета, туку за изнесување во јавноста на вистинити податоци. Адвокатот вели дека одбраната е должна да ги докажува оние околности кои како аргумент пред јавноста го презентираше лидерот на СДСМ Зоран Заев.