Српската премиерка Ана Брнабиќ по средбата со македонскиот премиер Зоран Заев кажа дека е договорена заедничка седница на двете влади кон крајот на февруари или почетокот на март следната година.
Таа кажа дека посетата на Заев е важна за целиот регион и продлабочување на соработката на двете земји.
– Регионалната соработка и регионалното поврзување е многу важно бидејќи без регионален мир и стабилност нема европски интеграции на Западен Балкан, рече Брнабиќ по состанокот со Заев во Палатата Србија.
Таа рече дека на заедничката седница следната година ќе бидат потпишани неколку важни договори и додаде дека Србија и Македонија ќе се посветат на јакнење на економската соработка помеѓу двете земји.
– Посетата е добар сигнал за сите нас, тоа е добар сигнал дека сите отворени прашања може да се решат со дијалог и тоа е вистинскиот чекор и понатамошното економско поврзување, рече српската премиерка.
Таа кажа и дека на состонокот се фокусирале на унапредување на работата на царината за да се олесни прометот на стоки помеѓу Србија и Македонија, но и големите инфраструктурни објекти како што е завршувањето на Коридорот 10, изградбата на пругата Будимпешта-Белград-Скопје и гасната конекција Врање-Куманово.