Без 34 пратеници на опозицијата и едниот пратеник на НДП се одржа конститутивната седница на новиот парламентарен состав. И покрај известувањата од опозицијата дека се откажува од мандатите, Верификационата комисија утврди дека се избрани 123 пратеници, а откажувањето на мандатите како што беше протолкувано, не може да биде прифатено. Верификувани се сите 123 мандати, а пратениците можат да дадат оставки на функциите.
Согласно извештајот на ДИК неоспорно е дека коалицијата околу СДСМ како и пратеникот на НДП се избрани за пратеници на предвремените избори, но потребна е писмена согласност на кандидатот, која што е неотповиклива, беше кажано во Собранието.
По Верификационата комисија, следува избор на претседател, заменик на претседателот, членови и нивни заменици на Комисијата за прашања на изборите и именувањата, која може да предложи претседател на Собранието од редот на пратениците. Претседател на Собранието можат да предложат и најмалку дваесет пратеници. За да биде избран претседател на Собранието потребни се 62 гласа.
