Министерството за внатрешни работи во овој момент може да соопшти дека операцијата во кумановската „Дива населба“ е завршена.
Терористичката група која беше стационирана во неколку објекти и претставуваше закана по безбедноста на граѓаните и на Република Македонија е целосно неутрализирана и елиминирана.
Станува збор за една од најопасните терористички групи кои беа закана за целиот регион и која изминативе години беше инволвирана во бројни напади, а нејзините членови беа предмет на меѓународни потерници за најтешки кривични дела.
Според сомненијата, лидери на оваа група се озлогласените Мухамед Красниќи таканаречен командант Малишева, Мирсад Ндрецај таканаречен командант НАТО, Сами Укшини таканаречен командант Соколи, Бег Ризај алијас командант Бегу и Деме Шеху, алијас Јунику. Сите петмина се косовски државјани и се доведуваат во врска со формирање на бројни терористички и екстремистички групи во регионот, односно фигурираат како основачи на паравоени структури.
Според првичните сознанија, тројца од нив синоќа и се предадоа на полицијата, но сеуште се работи на потврдување на нивниот идентитет. На лице место досега се пронајдени и 14 тела во униформи чиј идентитет дополнително ќе се утврдува. Меѓу нив засега е препознаен Џафер Зумбери од Ѓаковица. Во овој момент не можеме да исклучиме дека има и други загинати терористи со оглед на фактот дека објектите од кои ја напаѓаа полицијата се значително оштетени и можно е во одредени простории кои дополнително треба да се проверат да има уште тела.
Овие објекти се обезбедуваат и во тек е увид на лице место. Првично пронајден е голем арсенал на оружје кој ќе биде подигнат и вештачен.