Апелациониот суд ја заврши седницата по жалбата на решението на Кривичен суд поднесена од екс-директорот на ЈП за државни патишта Љупчо Георгиевски. На седницата присуствуваа обвинителите на СЈО, Гаврил Бубевски и Стевчо Донев, а Георгиевски беше застапуван од адвокатот Стеван Павлески.
Адвокатот на Георгиевски смета дека изречените мерки на претпазливост, односно одземањето на пасошот, за Георгиевски се престроги и според него Судот донел бирократска одлука. Павлески потенцираше дека во барањето за определување мерки на претпазливост СЈО го навело брачниот и семеен статус на обвинетиот, што според него е нерелевантно за определување мерка на претпазливост.
Од друга страна, обвинителот Бубевски пред Судот рече дека остануваат на барањата за определување мерки на претпазливост.
За жалбата на Георгиевски ќе одлучува Кривичниот совет во состав: Лилјана Ивановска Шопова како судија известител, Јани Нича и Африм Фидани.
Љупчо Георгиевски е еден од обвинетите во предметот на Специјалното јавно обвинителство „Траекторија“ за кинеските провизии за изградбата на автопатот Миладиновце-Штип и Кичево – Охрид.