„Нашата земја заслужува напредок“ порачаа битолчани од улиците на Широк Сокак со кои се сретна заменик претседателката на СДСМ, Радмила Шекеринска при вчерашната посета на Битола. Се разговараше за проблемите што ги тиштат, за големата безработица, за егзодусот на младите од Битола и битолско, за лошото владеење на власта.
Прошетката по битолскиот Ат пазар, по Градскиот пазар, Старата Чаршија ја покажа суровата реалност дека продавачи има многу, купувачи скоро воопшто и да нема.
Купувачите се стискаат што ќе купат, продавачите едвај ја обезбедуваат егзистенцијата.
Дуќани во чаршијата и на пазарите, за коишто пред десетина година се чекало на ред да бидат изнајмени, сега се празни, напуштени и оставени на забот на времето.
„Луѓето си заминаа. Огромните казни им ги затвораат дуќаните“, загрижено коментираат битолчани.
Заменик претседателката на СДСМ, Шекеринска рече дека СДСМ има визија како да ја нормализира државата. Парите ќе се вратат кај граѓаните, ќе се обезбедат услови за пристојна работа на сите граѓани, ќе се врати средната класа во Македонија којашто ќе обезбедува мирен и достоинствен живот на сите граѓани.
Во центарот на Битола заменик претседателката најави дека СДСМ ќе се заложи и за комплетна реконструкција и ставање во употреба на напуштениот Офицерски дом, којшто е оставен руиниран поради огромната негрижа за спомениците на културата од локалната и централната власт.
Средбите со граѓани продолжија во Нова Битола и Кукуречани каде што заменик претседателката на СДСМ, Шекеринска, порача дека СДСМ е одлучна заедно со граѓаните да ги направи промените во Македонија.