„Изгледа, нема крај на скандалите поврзани за министерот за транспорт и врски Миле Јанакиески, а ниту со скандалозните врски на министрите во Владата на Груевски со странски компании во земјава.
Од цела Македонија, токму во куќата на министерот Јанакиески во Прилеп е седиштето на германската фирма Лудвиг Фајфер.
Тоа е токму таа фирма, којашто е избрана да ја гради канализациската мрежа во Прилеп, во рамки на милионскиот проект Пречистителна станица“, рече на денешната прес-конференција, портпаролот на СДСМ, Петре Шилегов.
„Еве го Имотниот лист. Сопственик на куќата од 355 м2 на улица Браќа Ламески, број 32 е Миле Јанакиески.
Еве ја Тековната состојба на фирмата Лудвиг Фајфер, подружница Прилеп, регистрирана во септември 2013 година. Адреса БРАЌА ЛАМЕСКИ, БРОЈ 32–ПРИЛЕП.
Проектот тежок 30 милиони евра, европски пари и пари од Буџетот на граѓаните на Република Македонија, почна токму со реконструкција на канализациска мрежа во Прилеп, а изведувач на работите, како што изјави лани директорот на прилепското јавно претпријатие Водовод и канализација, Сашо Николоски, е германската фирма Лудвиг Фајфер.
Сега, министерот за транспорт и врски Миле Јанакиески треба да објасни:
-Како токму странска фирма регистрирана во неговата куќа, добила милионски бизнис во проект координиран помеѓу Владата на Груевски и локалната власт на ВМРО-ДПМНЕ во Прилеп?
-Како се случило од сите можни локации во Прилеп и низ Република Македонија, токму куќата на Миле Јанакиески во Прилеп да биде седиште на подружницата на германската компанија во земјава?
-Каква е врската на Миле Јанакиески со фирмата Лудвиг Фајфер“, праша Шилегов.
