Шефицата на Обвинителството за гонење организиран криминал по речиси три часа во Советот на јавни обвинители, рече дека освен премиерот Зоран Заев, кај кого Орце Камчев го пријавил случајот, нема други спомнати политичари во записникот од сведочењето на бизнисменот за истрагата во случајот „Рекет“.
„Заев е спомнат само во тој дел од сведочењето кај Јордан Камчев, каде што вели дека пријавил кај него“, рече Русковска.
Оцени дека она што било објавено во некои од медиумите, а е поврзано со записникот на Орце Камчев, е дезинформација.
Обвинителката рече дека на членовите на Советот им презентирала некои од доказите, искази на сведоци и записникот од Орце Камчев.
Русковска потврди дека утрово кај неа сведочел Жарко Луковски по вторпат на негово барање.
„Дојде уште еднаш за да даде дополнителни сознанија“, рече шефицата на Обвинителството.
На седницата не присуствува републичкиот јавен обвинител, Љубомир Јовески.
На прашање кога ќе биде повикан првоосомничениот Бојан Јовановски на распит, Русковска рече: „Кога ќе оценам дека треба да го повикам“.
Таа рече дека интензивно се работи финансиската истрага за предметот. За торбата Луј Витон со парите, рече: „Нешто знаеме, а за нешто работиме“.