Од Владата не сакаат да коментираат дали разрешувањето на директорот на струшкиот затвор Арменд Шаќири е поврзано со полициската акција во Струга. Барањето за оставка Шаќири го поднел пред неколку дена, но причините не се наведени.
– Шаќири поднел барање за разрешување до Владата и тоа вчера беше разгледано и прифатено. Нема да коментираме постапки за кои се надлежни други органи, како полициската акција спроведена изминатите денови, рече владиниот портпарол Мухамед Хоџа.
Викендов МВР соопшти дека била спроведена голема полициска акција во Струга и струшкиот регион за сузбивање на криминална група која продавала дрога и оружје. Полицијата приведе седуммина, а еден е во бегство. осомничените веќе одлежувале затворска казна но од отворен тип. Под истрага се повеќе лица, меѓу кои и еден инспектор од полициската станица во Струга, а според неофицијални информации се сомничат и вработени во затворот кои ја злоупотребиле службената положба и им помагале на затворениците.
Галена Николовска-Ризвановиќ