Како дополнителен заменик министер уште пред пет дена одовде, од Тиквешијата, побарав инспекторите да престанат со малтретирање на лозарите и со манипулациите со примената на измените на законот за вино. Побарав Владата веднаш да донесе интервентни мерки за откуп на вишокот заради стабилизација на пазарот. Побарав државата да биде гарант на откупот, рече Љупчо Николовски, дополнителен заменик министер за земјоделство, шумарство и водостопанство.
И добро е што нашиот притисок над Владата почнува да дава резултат. Но мерката за помош на винарските визби односно откупувачите, која се однесува само на ограничено количество откупено грозје и тоа само од сортата вранец, не значи ништо за лозарите. Нема никаква директна поддршка во цената што треба да ја добијат, а да не зборуваме за исплата на штетата што лозарите ја претрпеа од несобраното грозје коешто досега остана да калира.
Владата, наместо законското решение за исплата за 3 месеци, преку ноќ го смени законот и предвиде исплатата на лозарите да се врши од 6 до 8 месеци по предавањето. Да биде трагедијата поголема, огромен број лозари немаат добиено пари ни за предаденото грозје од минатата година.
Нам ни се потребни системски, а не ад-хок решенија, затоа што Министерството мора да ги има сите анализи и инфорамции за производството на лозарите, залихите на визбите и потребите на пазарот.
Нема да дозволиме оваа мерка на Владата да биде само инструмент за остварување на лични интереси на поединци од власта вклучени во овој бизнис и за уцени и притисоци над лозарите пред избори.