ВИДЕО: Наместо само иселениците, секој може да се попишува, Симовски обвинува за упад во системот

Од:

Веб-страницата преку која треба да се попишува населението што живее во странство е со повеќе аномалии и пропусти, апелираат програмерите, но директорот на Државниот завод за статистика, Апостол Симовски, тврди дека тоа не е така. Иако веб-страницата не дозволува да се попишат лица што се во Македонија, сепак, со користење бесплатна алатка за ВПН може да се пристапи до него и да се внесат податоци. Па, така, освен иселениците, преку веб-страницата може да се попишат и лица што се во Македонија.

„А1он“ успеа да пристапи до страницата. Кога пристапивме со локална ИП адреса, на веб-страницата даваше порака дека пристапот од Македонија не е дозволен. Откако искористивме алатка за користење на ВПН, што ја маскира ИП-адресата што ја користиме, ни беше дозволен пристап до формата за попишување. Во неа, можеше да се внесуваат податоци и испраќаат до Државниот завод за статистика. Често на крајот од пополнувањето на формата за попишување, веб-страницата знае и да падне, односно да не ги меморира внесените податоци.

Ваквиот проблем остава и простор некој да ја блокира базата со користење на т.н. ботови, односно внесување лажни информации. Но, за директорот на Државниот завод за статистика, Апостол Симовски, тоа не е безбедносен проблем, туку удар врз системот, што се казнува. Тој тврди дека пристапот до веб-страницата преку алатки не е нејзин недостаток за попишување и дека системот е супер. Тој најави и казни за лицата што пристапувале до оваа страница со ВПН, но не знаеше да каже како ќе се лоцираат со оглед дека со алатката при пристапот веќе корисникот ја скрил својата ИП-адреса.

„Се сè регулира и се сè проверува и казнува. Тоа е кривично дело за кое е предвидено и до три години затвор. Системот е безбеден и е супер. Ова е упад, намерен, а некои сакаат да проверат и од радозналост. Но, некогаш има и намера. Имаме мерки за заштита и сè се регистрира и ќе се казнува. Јас не би можел да кажам како, за тоа има стручњаци. На крајот, водевме многу сметка за безбедноста, потрошивме премногу време и пари. Веб-страницата не чинеше ништо, мерките се прават пошироко, дополнително. Апсолутна заштита има, безбедени се податоците“, вели Симовски за „А1он“.

Во однос на укажувањата од иселениците дека веб-страницата не ги меморира податоците и дека успеваат да се попишат дури по повеќе обиди, Симовски тврди дека не е така.

„Грешка појавува ако нешто тие погрешат, тогаш ги враќа назад. На секое прашање има кратко упатство. Во текот на вчерашниот ден имаше над 10 илјади пополнети прашалници. Сите грешиме, затоа, кога ќе има грешка, системот му кажува на корисникот. Веб-страницата не паѓа“, додава Симовски.

Би можело да ве интересира

ВМРО-ДПМНЕ нема да ги признае бројките од попишаното нерезидентно население, вели Мицкоски

Жарко Настоски

Собранието ги одложи пописот и локалните избори

Жарко Настоски

Прекината седницата за одложување на пописот, пратеници не можеле да најдат место за паркинг

Жарко Настоски

Измените на Законот за попис поддржани во Комисијата за европски прашања, утре се пред Законодавно-правната комисија

Жарко Настоски

Прекината собраниската седница, измените на Законот за попис на комисиска расправа

Жарко Настоски

Најчевска: Нема друга држава која до последен момент не знае дали ќе има попис, ова нема врска со право

Кристијан Ландов