Александар Нацев од ВМРО-ДПМНЕ на прес-конференција изјави дека криминалците кои што СДСМ ги ослободи со амнестијата пустошат по улиците на Скопје.
– Во Скопје криминалот завладеа на улиците. Граѓаните секојдневно се жртви на насилници, дилери, ограбувачи и криминалци. Црната хроника во медиумите се повеќе се полни со случаи каде граѓаните се малтретирани и ограбувани од криминалците што ги ослободи владата на СДСМ. Како резултат на амнестијата која ја спроведе владата на СДСМ и Зоран Заев околу 1.000 криминалци беа пуштени на улица. Граѓаните на своја кожа веќе ги чувствуваат последиците од оваа катастрофална одлука. За јавноста да има претстава колку СДСМ и Зоран Заев ја направија Република Македонија небезбедно место за живеење би сакале да ви презентираме дел од криминалот на оние кои беа ослободени од затворите, а жртви беа граѓаните, рече Нацев.
Тој наведе дека на 21-годишното лице со прекар Оревче му биле потребни само три часа од пуштањето од затвор до ново разбојништво.
– Тој бил затекнат од сопственикот на куќата која што ја ограбувал, кого физички го нападнал и го претепал. Сличен е случајот и со 37 годишно лице кое во Идризово долги години издржувал казна затвор за повеќе кривични дела, како кражби, тешки кражби, разбојништво, кражба на возило и дрога. Уапсен бил од страна на полицијата во населбата Ново Лисиче, каде што извршил дрска кражба а се обидел да изврши и разбојништво. Зад решетки повторно завршила и осуденичка која била амнестирана за дрога. Сакаме да ја прашаме полицијата колку кривични дела од областа на насилниот криминал и имотните деликти се случиле изминативе неколку недели на подрачјето на Град Скопје? Колку дела се расчистени, а колку не? Колку од делата каде жртви се граѓаните се сторени токму од лицата кои ги амнестираше Зоран Заев? Дали полицијата има некаков план со посебно ќе ги следи лицата кои беа амнестирани од Зоран Заев?, запраша Нацев.
Тој рече дека ваквиот непромислен потег од страна на СДСМ и Зоран Заев е погубен за граѓаните на Република Македонија.
– СДСМ свесно ги стави во опасност животите на сите жители во рацете на криминалците и не врати во едно време на минатиот век кое сакаме да го заборавиме. Карактеристично за сите влади на СДСМ е кога тие се на власт криминалот, рекетарството, разбојништвото и трговијата со дрога да бидат главна карактеристика на нивното владеење. Сакаме да запрашаме дали граѓаните на Република Македонија кога гласаа за „Живот“ гласаа за криминалците да им ја одредуваат нивната судбина или пак се надеваа дека поголемите плати, вработувањата, зголемениот животен стандард ќе бидат дел од нивниот секојдневен живот, праша Нацев.