Пожарот што избувна во реонот на тврдината Исар во Штип е ставен под контрола благодарение на брзата интервенција на копнените екипи и воздушната поддршка со „ер трактор“.
Според последните информации од терен, огнот повеќе не претставува опасност за блиските куќи и нема знаци на негово понатамошно ширење. Надлежните служби продолжуваат со активности за целосно догаснување и обезбедување на подрачјето околу Исар.
Во меѓувреме, активен е и пожарот во Пробиштипско, кој започнал меѓу селата Бучиште, Неокази и Петршино. Од Дирекцијата за заштита и спасување информираат дека пожарот во атарот на Бучиште е локализиран, но во него изгорела една куќа. Дел од огнената линија се префрла кон селото Ратавица, каде екипите продолжуваат со интервенција.
Третиот активен пожар е во Општина Чешиново-Облешево, во атарот на селото Новоселани, каде гори ниска вегетација. Надлежните служби ја следат состојбата и преземаат мерки за спречување на ширењето на огнот.