Бројни граѓани утрово на градскиот плоштад во Куманово донираат различни средства, како еден вид поддршка за настраданите во поплавите во Србија и БиХ.
Пакети флаширана вода, конзервирана и бебешка храна, пелени, облека, прибор за лична хигиена, па дури и телевизори се само дел од средствата кои што граѓаните ги донираа на двата пункта во центарот на Куманово.
-Дониравме гардероба, средства за лична хигиена, вода, се што е неопходно-изјави жителка на Куманово.
Организаторите истакнаа дека Кумановци денес го покажаа она што отсекогаш го поседуваат, а тоа е човековата хуманост. -Не знам да кажам, дали или не очекувавме ваков одзив, но тоа и не е важно. Одзивот е огромен. За помалку од три часа собравме вода повеќе од два тони, другото не можеме да го изброиме.
Првата пратка е испратена во централното депо на Црвен крст во Скопје, се подготвува другата пратка-истакна Зоран Краљевски, еден од организаторите, кој додаде дека од утре на настраданите ќе им бидат потребни средства за дезинфекција.
-Кумановци денес се покажаа во многу добро светло. Иницијативата беше широко подржана од сите граѓани. Имаме соберено многу приоритетни средства. Најмногу се донира облека, храна, средства за хигиена и слично-истакна Александра Ристовска, која што е дел од групата Кумановци кои спонтано се организираа на социјалната мрежа „Фејсбук“.
Акцијата на плоштадот во Куманово ќе трае неколку дена, а организаторите повикаа да се приклучат сите граѓани, да донираат во што поголем број, бидејќи повеќе од потребна им е помош на настраданите во поплавите во Србија и БиХ.
Е.Г.