Со цел да ја изразат својата солидарност и да им дадат помош на настраданите во поплавите во Србија, Република Српска и Босна и Херцеговина, непартиско Здружение на граѓани од Куманово од утре ќе започне голема хуманитарна акција, насловена „Куманово за Србија и БиХ“.
Акцијата која што треба да започне утре во 11 часот, а ќе заврши во недела, ќе се одвива на три локации, односно на Градскиот плоштад, во населбата Карпош и село Љубодраг.
-Знаеме каква несреќа ги зафати нашите северни соседи, вклучувајќи ги и Република Српска и Босна и Херцеговина. Наша цел е да им помогнеме што е можно повеќе и со какви било средства. Ќе гледаме да обезбедиме вода, конзервирана храна, хигиенски средства и слично. Во корелација сме со Црвен крст од Куманово, како и неколку други невладини организации- истакна Александар Крстевски.
Од Здружението апелираат во хуманитарната акција да се вклучат што поголем број граѓани, како и политички партии, компании и слично.
Е.Г.