Наместо туш кабините, градската плажа „Камен мост“ на кејот на Вардар нуди спас од горештините со црева за разладување за посетителите, кои воопшто и ги нема.
Четирите туша кои беа поставени уште при свеченото отворање од страна на градоначалникот на град Скопје Коце Трајановски и премиерот Никола Груевски, сега се заменети со црева, од кои со едното од нив најверојатно се наводнуваат цвеќињата кои се посадени веднаш до влезот на плажата.
Ниту неколкудневните горештини кои го зафатија Скопје не можат да ги извлечат од дома жителите на главниот град да се сончаат на плажата „Камен мост“, која иако постои веќе неколку години, никако не успеа да заживее и да го врати стариот сјај на Скопје.
Лежалките се склопени, а долж плажата нема ниту човек да прошета, да седне и одмори под сенка под дрвените монтажни платформи и да се освежи со пијалак.
Огромниот простор на кој е распослана „Камен мост“ од 1.775 метри квадратни, има и детско катче со нишалки, бина за манифестации, две чешми, четири соблекувални, паркинг за велосипеди и корпи за отпадоци.
За нејзината изградба Градот Скопје издвои девет милиони денари.
Петар Клинчарски