Кандидатите за градоначалници од ВМРО-ДПМНЕ и коалицијата „За подобра Македонија“ за Град Скопје и општина Ѓорче Петов, Коце Трајановски и Сокол Митровски денеска го промовираа проектот за расчистување на имотно-правните односи за проширување на дел од булеварот „4 Јули“.
Со овој проект се предвидува расчистување на имотно-правните проблеми кои постојат на трасата на дел од овој булевар, како и негово проширување.
– Досега неколку пати во мојот мандат разговарано е со сопствениците на куќите кои се лоцирани на овие стеснувања на трасата на булеварот „4 Јули“, меѓутоа не успеавме да постигнеме договор. Изминатиов период се интензивираа овие разговори и јас се надевам дека наредниот период ќе ги расчистиме имотно-правните односи, со што конечно овој булевар ќе го направиме да биде проточен како што е и предвидено според деталниот и генералниот урбанистички план, изјави Трајановски.
Дополнително, како што рече, на булеварот „4 Јули“ ќе биде извршена санација на асфалтот и атмосферската канализација за овој булевар да ја добие својата вистинска функција.
Трајановски потенцираше дека за реализацијата на овој проект неопходна ќе биде и помошта од страна на општина Ѓорче Петров, пред се во делот на расчистувањето на имотно-правните односи, како и сите потребни согласности и дозволи.