На денешната седница на Собранието, пратеникот од #Левица, м-р Сашко Јанчев, со процедурално обраќање побара потпретседателот на Собранието да го искористи правото кое му го дава Деловникот и да го откочи Законот за бранителите.
Тој посочи дека Африм Гаши од ВРЕДИ одбива да го стори тоа, но дека прашањето е зошто тоа не го прави Антонијо Милошовски од ДПМНЕ, кој има целосно право да свика седница и да назначи претседавач од редовите на сопствената партија.
Јанчев истакна дека процедурата е едноставна, а одблокирањето целосно зависи од ВМРО-ДПМНЕ, но дека тие не постапуваат затоа што им е побитна коалицијата со ВРЕДИ. Потсети дека во 2023 година ДПМНЕ поднела речиси идентично законско решение, при што и самиот потпретседател бил трет потписник. „Што се смени од тогаш до сега? Што е разликата помеѓу ВМРО во 2023 и ВМРО во 2025? Која е разликата помеѓу Антонијо Милошовски тогаш и сега?!”– праша Јанчев.
Во продолжение нагласи дека кога биле опозиција, бранителите им служеле за политички поени, а сега, како власт, ги игнорираат. Јавно порача дека доколку не се закаже седницата на Комисијата, пратеничката група на Левица ќе поднесе ИНТЕРПЕЛАЦИЈА за блокирањето на Законот за бранителите, како и за т.н. „тајванска авантура“ за која јавно реагираше и амбасадата на Народна Република Кина во Република Македонија.