Повеќе населени места и десетина улици се под вода, по краткиот дожд во Ѓорче Петров. Орман, Волково, месноста Шкорпион, дел од Ново село, но и Даме Груев се само дел од општината каде по десетминутниот дожд, автомобилите во вода. Бидејќи голем дел од овие населени места немаат атмосферска канализација, водата се излеваше по дворовите на жителите и малите улички. Секој од нив е револтиран, но не и изненаден. Велат дека ова се случува постојано, а проблемот не го решава никој.
„Ова се случува нонстоп. Никој не го интересира да го реши проблемов. При поголем дожд освен дворовите се поплавуваат и подрумските простории. По улица автомобилите прскаат по пешаците“, вели жител на месноста Шкорпион.
Пешаците кои се движеа по тротоарите, наместо со чадорите да се штитат од дожд, тие се штитеа од водата по улиците која се разлева по секое поминување на возилата. Поплавно беше и во Волково кај кружниот тек. Од Волково до Орман, пак, места кои се оддалечени три километри, на улицата има и одрони од карпи. Патот до таму не беше исчистен ни по претходниот дожд од минатата недела, а има и куп камења и кал.