Демократската обнова на Македонија побара одговор за тоа какво решение договорило Министерството за надворешни работи за бегалската криза. Според нив, мора да се знае каков договор е направен зад грбот на македонските граѓани и во чиј интерес и чија штета е договореното.
– Каква е таа помош што и се нуди на Македонија „во опрема и војска“, како што рече австрискиот министер Курц? Дали некој има намера земјата да ја претвори во логор, праша портпаролот на ДОМ, Тони Христов.
ДОМ го поздравува и позитивниот чекор, односно прекинот на огнот во Сирија договорен на Минхенската безбедносна конференција. Според портпаролката на ДОМ, Маја Морачанин, тоа е надеж за целата демократска јавност дека има опција за траен мир во тој дел од светот.
– Треба да се спроведе некој вид Маршалов план за сиромашните земји, за прераспределба на богатството и намалување на огромните разлики, затоа што додека тие постојат, ќе има реки бегалци кон побогатите земји, вели Морачанин.
Александар Тодески