Припадниците на Единицата за прв одговор и интервенција денеска во Центарот за обука во Идризово изведоа тактичко показна вежба и ја демонстрираа својата подготвеност за справување со различни видови предизвици. Денеска беа одбележани и 14 години од функционирањето на оваа единица.
„Денес практично е незамисливо функционирањето на Секторот за внатрешни работи Скопје, како организациска единица најспецифична и најсложена по обем и задачи, без присуството на единицата ‘Алфа’ во етаблираниот полициски концепт на работа на подрачјето на нашиот главен град. Всушност сето она што ја одликува и карактеризира работата на полициски службеник е обединето во секојдневието на ‘алфите’ – предизвиците, високиот професионализам и стручна подготвеност, нужната законитост во постапувањето“, рече министерот за внатрешни работи, Оливер Спасовски.
Како една од суштинските алки во системот на оперативно полициско работење единицата, додаде тој, „Алфа“ треба и мора да продолжи со натамошна професионална надградба и развој во сите нејзини аспекти на работење.