Претседателот на Собранието Трајко Вељаноски денеска оствари средба со членовите на Парламентот на Обединетото Кралство на Велика Британија и Северна Ирска Брајан Бинли и Марк Причард.
На средбата стана збор за актуелните состојби во двете земји, како и за евро-атлантските интеграции на Република Македонија. Бинли и Причард искажаа поддршка за македонското членство во НАТО и Европската унија, истакнувајќи воедно дека ќе се заложат за претставување на Република Макдонија и нејзино актуелизирање.
Претседателот Вељаноски ги потенцираше трпеливоста и оптимизмот што ги има македонската страна на патот кон интегрирањето и дека е од особено значење да бидеме формално интегрирани во европските процеси бидејќи и територијално припаѓаме на Европа. Беше потенцирана и важноста од развој во сите области кои придонесуваат кон подобрување на квалитетот на животот на граѓаните со најголем акцент на економскиот развој.
На средбата беа истакнати важноста и позитивните продобивки кои ги носи парламентарната дипломатија што се остварува преку овој вид разговори, како и сите соработки кои Собранието на Република Македонија ги имало со Обединетото Кралство. Исто така беше потенциран и континуираниот пријателски однос на двете земји.
