Претседателот на Собранието на Република Македонија Трајко Вељаноски денеска се сретна со албанскиот министер за надворешни работи Алдо Бумчи, кој престојува во официјална посета на Македонија.
На средбата, како што информира кабинетот на претседателот на Парламентот, Вељаноски ги истакнал пријателските односи меѓу двете држави и заемната поддршка на билатерален и мултилатерален план. Вељаноски искажал благодарност за како што е наведено, јасната, константна и принципиелна поддршка на Албанија за зачленување на Република Македонија во НАТО, иако двете држави заедно почнаа да одат кон оваа цел.
– Во однос на етничките односи, Република Македонија дава голем придонес во спроведувањето на Охридскиот рамковен договор, се вели во соопштението.
Претседателот на Собранието изразил задоволство за враќање на топонимите во населените места каде живеат Македонци во Република Албанија. Во таа насока, се наведува во соопштението, двете држави покажуваат зрелост во меѓусоседската соработка.
Вељаноски искажал задоволство од спроведените локални избори во Македонија, истакнувајќи ја демократската зрелост на државата и му посакал на Бумчи во јуни во Албанија да бидат организирани фер и демократски избори.
Министерот Бумчи го потенцирал искрениот, пријателски однос меѓу двете држави и повторил дека Република Албанија го почитува суверенитетот и интегритетот на Република Македонија. Во однос на економската соработка, тој искажал уверување дека со изградбата на патната инфраструктура во двете држави таа ќе се зголеми на поголемо ниво. Изразил задоволство од отворањето на повеќе гранични премини и преминувањето на границите на двете држави само со лични карти.
Вељаноски и Бумчи изразија уверување дека во иднина односите меѓу двете држави ќе го задржат високиот степен на пријателство и разбирање.