Австрискиот експерт, инжeнер за рударство Гунтер Кобалт од Виена со посредство на македонската Влада неделава е во посета на велешката фабрика за талк „Димче Мирчев“ каде со својата стручност треба да му помогне на менаџерскиот тим во процесот на производство и за поголема конкуретност на нивните производи.
Според неговите првични анализи, велешката фабрика има одлична суровина на шкрилец и талк и треба да го зголеми производството на производи од шкрилец кои првично би се пласирале на домашниот пазар и во земјите од регионот, а потоа и на европскиот и светскиот пазар.
– Сопствениците најпрво треба да направат свој бизнис план за пласман на шкрилецот со којшто ќе се побараат и странски инвеститори и заинтересирани партнери со кои ќе можат понатаму да го разработат овој проект, истакна Кобалт.
Негова задача, како што појасни, ќе биде да ги провери и сите европски производители на шкрилец и да види какви се нивните размислувања за заедничко вложување со велешката фабрика.
Сопственикот Благој Шалев информира дека заедно со Кобалт ги посетиле двата рудника кои ги имаат под концесија и оти од негова страна е сугерирано дека треба да се вложува во шкрилецот.
– Со неговата стручна помош ќе направиме комплетен бизнис план, отпочнување на производство и барање на пазар и вистинскиот вид на производ којшто ќе го понудиме на европскиот и светски пазар, истакна Шалев.
Австрискиот експерт и помогнал на компанијата и во начинот на експлоатација на шкрилецот, начинот на производство, набавката на нови машини и слично.
Фабриката „Димче Мирчев“ сега произведува шкрилец за ограничен македонски пазар, односно само по нарачка. Нивниот шкрилец е искористен за уредување на Вевчани, Бигорскиот манастир и други објекти.