Во американскиот Стејт департмент не реагираат за изборниот бојкот на дел од опозицијата во Македонија. САД се приклучија на заедничкото кусо соопштение, заедно со амбасадите на Европската Унија, НАТО и ОБСЕ од минатата недела, во кое се побара политички дијалог и ставање на стратешките приоритети на земјата на прво место.
Дополнително, освен неформални изрази на жалење, американската дипломатија веќе подолго време наназад не сака дополнително да ги коментира случувањата во Македонија. Нема најави ниту за посета која би имала карактер на посредување меѓу македонските политички партии.
Заменикот помошник државен секретар Филип Рикер наскоро ќе го посети регионот и ќе престојува во Албанија, но не се спомнува посета и на Македонија. Рикер за Тирана, преку интервју, најави порака дека претстојните парламентарни избори во Албанија ќе се сметаат како литмус тест за демократијата во оваа земја и побара Албанија да продолжи да работи на реформите потребни за добивање кандидатски статус за членство во Европската Унија.
Американскиот Стејт департмент се уште се комплетира, по доаѓањето на државниот секретар Џон Кери и очекуваното заминување на помошникот државен секретар за Европа и Евроазија Фил Гордон, кого го очекува трансфер во Централниот, европски регион на Советот за национална безбедност на претседателот Обама.
Во меѓувреме, пораки дојдоа од американскиот Конгрес, преку конгресмените кои работеле или работат на развојот на демократијата во Македонија. Демократот Дејвид Прајс кој претседава со Комисијата за поддршка на демократијата, по средбата со претседателот на македонското Собрание Трајко Вељаноски при неговата неодамнешна посета на Вашингтон, ја оцени Македонија како клучна демократија во балканскиот регион и земја за пример за соседите.
Ерл Померој, поранешен демократски конгресмен и член на истата Комисија, оцени дека тешките прашања треба да се решаваат во Собранието, низ демократски процес и со почитување на владеењето на правото.