Зголемениот водостој на реката Вардар предизвика излевање на водата на критичните точки во општина Гевгелија, пред се на крајбрежните делови во атарите на селата Миравци и Мрзенци кои се претежно земјоделски површини, а под вода е исто така и мото крос патеката кај Гевгелија.
Состојбата со Петрушка, Конска и Сува Река е целосно нормализирана по враќањето на водата во коритата, беше соопштено денеска на стручниот колегиум со кој раководеше градоначалникот Иван Франгов.
Сообраќајот во Општината е повторно нормализиран и воспоставен на сите патни правци, вклучително и од Гевгелија кон Моин како и на патот Миравци-Милетково, кој беше прекинат поради оштетувањата на мостот на Петрушка Река.
Градежната инспекција интервенираше на критичните точки на Сува Река, каде е спречено излевање на водата. Механизацијата моментно е ангажирана на пренасочување на коритото на Мрзенска Река која поплави земјоделски посеви, фарми и други објекти на крајбрежјето.