Советот за радиодифузија во четврток најверојатно ќе ја одземе дозволата за реемитување на австралиската телевизија БОМ која во иднина требаше да биде преименувана во А3, дознава А1 од извори во Советот. Точката на дневен ред за преиспитување на начинот на кој оваа телевизија емитува програма во Македонија е веќе ставена на дневен ред. Формално, како подносител на иницијативата се појавува извесен П. Николов, кој во претставката до СРД навел дека дозволата на БОМ треба да биде одземена бидејќи телевизијата работи без регистрација, а фирмата сопственик била банкротирана.
Во СРД мнозинство се членови предложени од ВМРО-ДПМНЕ, вкупно осум од 15, па се очекува одлуката да биде донесена без проблем.
Според најавите, проектот А3 телевизијата требаше да стартува со емитување на вести и друга програма од денеска, но од непознати причини беше соопштено дека стартот се пролонгира на неодредено време.