Бојан Јовановски познат како Боки 13 и Зоран Милевски познат како Зоки Кичеец се во добра здравствена состојба, а од управата на затворот „Скопје“ велат дека нивното однесување е коректно и дека немаат никакви барања. Оттаму тврдат дека не се точни шпекулациите дека Боки 13 барал да биде преместен на психијатрија, како што беше објавувано во некои домашни и странски медиуми.
„Јовановски е во добра здравствена состојба, Милевски исто така. Тие не бараат да одат на прегледи, ниту се жалат на здравствени проблеми. Јовановски минатата недела беше на ортопедија, а на Милевски му беше извршен зафат. Тие се однесуваат коректно“, велат од управата на затворот „Скопје“ за „А1он“.
Од затворот се категорични дека Боки 13 не побарал да комуницира со јавноста, ниту постои начин тоа да го направи.
„Не постои никаков начин“, велат од затворот.