Екипите на Град Скопје во рекордно време ја завршија реконструкцијата на улицата „Лазар Личеноски“ кај скопското Кале. Улицата се реконструираше на потегот од СРЦ „Кале“ до крстосницата со булеварот „Никола Карев“, што претставува втора фаза од обновата на оваа значајна сообраќајница. На оваа делница се изврши целосна реконструкција на коловозот во должина од 1.300 метри, реконструкција и проширување на постојните тротоари, како и замена на оштетените рабници, информира Град Скопје.
„Со нанесување на завршниот асфалтен слој на улицата Востаничка во општината Кисела Вода, екипите на Град Скопје, ја завршија реконструкцијата на оваа значајна сообраќајница, на потегот од улицата Црниче до улицата Свети Наум Охридски. Во изминатиот период на оваа делница долга 1.100 метри беа обновени коловозот и рабниците, а беа реконструирани и тротоарите со замена на бекатон-плочките, но беа и изработени и 76 нови приклучоци во водоводната мрежа за да се обезбеди континуирано и квалитетно водоснабдување. Улицата Востаничка е продолжение на улиците Бихаќка и Црниче кои беа предмет на реконструкција минатата година“, соопштува Град Скопје.
„Во текот на денешниот ден ќе биде завршена реконструкцијата на коловозот на улица Никола Карев кај Нова железничка Станица и тоа на потегот од к-ца со булевар Кузман Јосифовски Питу до к-ца со бул. 3-та Македонска Бригада, со што целосно ќе бидат завршени три скопски сообраќајници. Долж улицата освен реконструкцијата на асфалтот од коловозот во должина од 510 метри, реконструирани се и тротоарите, направена е нивелација на сливниците и атмосферските шахти, како и замена на оштетените рабници. Со пробивањето на улицата Есенинова, реконструкцијата на оваа сообраќајница, па преку улицата Беласица, Град Скопје прави поврзување на три општини Кисела Вода, Центар и Гази Баба, а патувањето на возилата од бул. Борис Трајковски до клучката Континентал се очекува да биде скратено за повеќе од 10 минути“, се наведува во соопштението.