Забраната за тешки товарни возила на патниот правец Маврово – Дебар е укината од изутрината во девет часот, а од девет часот и 30 минути и за планинскиот премин Стража кај патот Гостивар-Кичево, соопшти Автомото сојузот на Македонија.
Се уште важат ограничувањата за сообраќање на камиони на патиштата Струга – граничен премин Ќафасан и Кичево – Македонски Брод – Прилеп.
Од АМСМ укажуваат дека сообраќајот на сите магистрални и регионални патни правци низ Македонија се одвива во зимски услови и по влажни коловози, особено во западниот дел од државата, каде има врнежи од снег со среден интензитет.
Поради многу ниски температури можни се подмрзнувања на коловозот, поради што се препорачува внимателно возење и прилагодување на брзината кон условите на патот. На повисоките планински и осојничави места има остатоци од снег кои го забавуваат движењето на возачите.