Водата од градскиот водовод во Струга е исправна за пиење и забраната за користење ќе биде тргната денеска, информира директорот на Центарот за јавно здравје-Охрид Атанаско Михаилов.
Според него, петте последователни анализи на примероци од струшкиот водовод покажале отсуство на патогени материи и инспектор од Агенцијата за храна и ветеринарство денеска ќе донесе решение за прекин на забраната за пиење и готвење.
– По хлорирањето на водата во градскиот водовод во Струга петте последователни микробиолошки и физичко-хемиски анализи покажаа дека водата е исправна за пиење и готвење, изјави Михаилов.
Резервоарите во селските водоводи, што не се дезинфицираат, нагласи дека и понатаму претставуваат опасност за здравјето на луѓето и имаат забрана за користење.
– Онаму каде што редовно се хлорира водата е исправна за пиење и готвење, но во резервоарите каде што не се става хлор водата е забранета за користење, рече Михаилов.
Анализата на водата од градскиот водовод во Струга направена пред десеттина дена покажале недостаток на хлор и присуство на колиформни бактерии, како ешерихија коли, по што надлежниот инспекторат донесе забрана за нејзина употреба.