Апелациониот суд ја укина пресудата која го обврзуваше портпаролот на СДСМ, Петре Шилегов, на поранешната министерка за внатрешни работи, Гордана Јанкулоска, да и исплати оштета во вредност од еден милион денари за нанесена клевета.
Пресудата беше донесена во февруари 2014 година, а се однесуваше на прес конференција во која Шилегов изнесе податоци за непропорционално четрикратно зголемен имот на Јанкуловска додека била на власт.
Апелациониот суд утврдил дека нема основ за клевета затоа што изнесените податоци за имотната сопственост на поранешната министерка се добиени од државни институции, како имотниот лист објавен на веб страната на Комисијата за спречување на корупција.
Предметот се враќа во првостепениот суд на повторно судење. Апелација посочува дека при повторното разгледување првостепениот суд ќе има задача да утврди дали изнесените податоци се од јавен интерес, затоа што Јанкуловска во тоа време била носител на функција, и врз основа на тоа да се цени дали е нанесена клевета.
Решението од Апелација на три страни Шилегов го објави на својот фејсбук профил.
