Ноќеска на аеродромот во Скопје е приведен 28-годишен гостиварец кого полицијата го барала поради закани кон техничкиот премиер Оливер Спасовски. За него имало и централен распис од Надворешната канцеларија за криминалистички работи Гостивар. Од МВР информираат само дека му е поднесена кривична пријава.
„Пред четири дена против него е поднесена кривична пријава за сторено кривично дело загрозување на сигурноста, предвидено во член 144 став 4 од Кривичниот законик. М.М. се сомничи дека преку социјалните мрежи упатувал закани односно ја загрозил сигурноста на функционер на Владата на Република Северна Македонија“, информираат од МВР.
Тој е задржан во полициската станица Гостивар и ќе биде изведен пред судија во претходна постапка во Основниот суд Гостивар.
Инаку, според Кривичниот законик, пропишаната казна за делото за кое го товарат е парична или затвор до шест месеци.
