На нови тројца полициски службеници, вработени во МВР, им е дијагностициран коронавирус, дознава „А1он“. Нивните тестирања, како и на 15 други службеници биле направени откако претходно, еден од нив појавил симптоми за присуство на коронавирусот. Сите, изминатава недела престојувале во Охрид, поради извршување на работни задачи, а биле сместени во одморалиштето на МВР, кај Свети Стефан.
Информацијата за „А1он“ ја потврдија и од МВР, од каде велат дека четворица службеници од тестираните биле негативни, а за останатите 11 вработени се чекаат резултати. Сите биле припадници на Единицата за брзо распоредување.
„Од досега добиените резултати тројца од нив се позитивни а четворица се негативни на вирусот ковид 19 додека за останатите 11 резултатите се очекуваат во текот на денешниов или утрешниот ден . Останатите полициски службеници во моментов се наоѓаат во самоизолација, а во тек е епидемиолошка анализа кај сите 18 полициски службеници која би требало да покаже кога и на кој начин се заразиле полициските службеници“, велат од МВР за „А1он“.
Техничкиот министер, Наќе Чулев, минатиот месец, последно кажа дека во МВР има 18 заразени вработени, потенцирајќи дека вирусот го добиле надвор од работното место.
