Трета сесија на „Обука за обучувачи“ се одржува во организација на Центарот за нови иницијативи во уметноста и културата „Локомотива“ во рамки на петгодишниот проект „Градина на Европа”, поддржан од Програмата култура 2007-2013 на Европската Унија.
Проектот, соопштија од „Локомотива“, е посветен на развој и професионализација на современиот танц, додека пак програмската активност „Обука за обучувачи“ е насочена кон истражување модели на образование и пренос на знаење во доменот на современите изведувачки уметности.
На сесијата, која ќе заврши на 20 мај, учествуваат признати професионалци (едукатори, кореографи, изведувачи, теоретичари и културни менаџери) од доменот на современите изведувачки уметности од Балканскиот регион и Европа. Исто така учестуваат и студенти на програмата за современ танц од катедрата за Балетска педагогија при Факултетот за музичка уметност.
Сесијата „Обука за обучувачи“, наведуваат од „Локомотива“ како модел за истражување и пренос на знаење дава простор на сите учесници (согласно нивните професионални позаднини и искуства) да ги истражуваат и взаемно споделат различни методи на образование.
Преку активна вклученост на сите учесници (како во улога на предавач, така и на учесник) сесијата нуди можност за запознавање на различните образовни пракси, а преку нив и развој на дискусија и истражување на методи на образование, начин на комуникија и поврзување со студентите, користење на простор, време, начин на подготовка на настава итн.